Naša štorija

Naša štorija počinje i vajk će bit o babi Jagi. 

Čuda ljudi ne riva upoznat svoju prababu. Mi smo vero bili te sriće. I magari smo uniput bili samo dica, nje se domišljamo kako da je bilo učer. 

Svaki put kad bimo pošli poli babe, bimo pošli anke vidit Jagu. Hodit po ten putu je bila kako jena mala avantura za nas dicu. Aš si moga nać pečurku eli kakovu jagodicu, a foši anke šparogu. Ma po leti NE SMIŠ hodit po suncu, po hladu hodi! I ona dva breka ne tiči. Aš bi te! (E TO je strah kad si dica)

Onda bimo doprli portun i pošli doli po tih šes škal do vrati. I onda dopreš vrata, a tamo vrime stoji. Vonj od starih bačvi na desno, suha žajfa na srid i kuhano mliko na livo.

Žur na špaheru. Bičve se suše na kantridi. Radio po tiho.

“Sidi, sidi, uzmi paštinu, uzmi paštinu!”. Te beside će nan zavajk ustat u glavi. Vajk je bila kakova paština. A ki ne uzme paštinu, ne znan ča je doša! Babu ne smiš ufendit. Nikad.

Govore da se dica navade bit prava tako da vide kakovi su pravi ljudi, i da je samo jena besida na svitu za povidat kakova je Jaga bila, to bi bila ta. 

A prava je bila aš je bila blaga. Ni njoj bila laka, nanke blizu, ma to je nju učinilo borcen, je je učinilo težakon. I kad se nje domislimo, prvo nan dojde kako se nasmihne, pak njoje ruke – pretrudne, predelane, umišene istrijanskon crvenicon. Svene ruke kako naša baba, kako mat…

I bila je zasvin milostivna. Imala je padele za si skuhat i robu za se obuć. Črnu traveršu i črni faco. Palicu za hodit. Krov zgor glave. I to je to. Ni bilo vode u hiži. Ni bilo televizije. Ni bilo telefona. Zahod je bija na srid korta... 

Ča bi Jaga rekla da vidi kakova je ta hiža danas? To nas pitaju. Mi se šperamo da bi bila jeno malo u pensiri, a malo više u čudu. “Ma ča govoriš ti? Ča sve to je u hiži?” “Ja, da je! Sidi, babo. Uzmi paštinu.”

Tako da, tu ni bilo ča pensat. Hiža je mogla imat samo jeno ime. Hiža je tu kadi je zbog nje. Hiža je njoja. Hiža je una.

​

​